Граѓаните на Република Северна Македонија се еколошки неедуцирани кога станува збор за тоа како да ги остварат своите права, но и во меѓувреме да ја заштитат и зачуваат животната средина во која што живеат.
Поради непостоење на правна пракса за заштита на правата од животна средина, особено до правото на пристап до вода за пиење и санитација како основно човеково право признато од Обединетите нации со Резолуција 64/292 како и уставното начело на недискриминација и правото на живот, право на здрава животна средина, право на здравје и домување, граѓаните секојдневно се соочуваат со повреда на истите.
Првичната цел на овој проект е да изврши едукација на граѓаните за тоа како да постапуваат со водата како ресурс и како истата да ја заштитат. Со фокус на едукација на младите и ранливите групи на граѓани, овој проект ќе помогне во заштита на нивното право на вода и санитација.
Земајќи ги во предвид влијанијата на климатските промени врз водните талози во државата, како и нивната неееднаква дистрибуција на територијата на Република Северна Македонија, со овој проект сакаме да поттикнеме и развиеме јавна дебата за заштита на водните ресурси во државата како и остварување на правото на вода и санитација затоа што истата во минатите години отсуствува.
За таа цел, на 23 март во склоп на овој проект ќе биде организирана конференција на која научната фела со помош на странски експерти ќе дискутира за неопходноста на имплементацијата на правото на вода и санитација во Уставот на Република Северна Македонија и можните идејни модели и решенија за тоа.
